NOTA DE PRENSA DO CCE ARQUIVO DE INCULPACIONS

NOTA DE PRENSA DO CCE ARQUIVO DE INCULPACIONS

Ante a nova aparecida onte nos medios de comunicación segundo o cal, o fiscal xefe da Área, Román Ruíz Alarcón, decidiu o arquivo das autoinculpacións presentadas polas membras e membros do Comité Cidadán de Emerxencia para a Ría de Ferrol, no procedemento que se segue contra os mariscadores aos que se lles imputa un delito grave nos sucesos de Maio de 2007, cando se lle impediu a entrada na Ría ao buque gaseiro Galicia Spirit, o CCE manifesta:

 Todo o mundo sabe que  o CCE promoveu a acción que o 7 de Maio de 2007 impediu a entrada na Ria de Ferrol do primeiro gaseiro cargado con GNL”Galicia Spìrit”. Nesta acción  participaron centos de persoas, entre elas as 31 que o pasado dia 1 presentaron un escrito de inculpación dirixido á Fiscalía.

 A actuación desta Fiscalía, apartando ao CCE e reducindo agora a 9 mariscadores  a imputación dos feitos, parece máis dirixida a castigar de xeito exemplar a un pequeno grupo de traballadores do mar, “asumible pola sociedade”,  que a facer xustiza.

  ¿Quererá o Sr. Fiscal que pase desapercibida a raíz do problema, que non é outro que a ameaza á vida de miles de persoas que supón a planta de gas de Reganosa no corazón da Ría de Ferrol?

 ¿Quererá o Sr. Fiscal que non se saiba que esta instalación esta acelerando a destrución do ecosistema da Ria, o medio de vida dos mariscadores?

 ¿Quererá o Sr . Fiscal que non se saiba que esta instalación é  produto dun acto continuado de corrupción do que se beneficia unha ínfima minoría?

 Lamentamos que as actuacións do Sr. Fiscal, sexan publicitadas nos medios de comunicación antes que se notifiquen aos afectados. Contrasta esa dilixencia, con outras actuacións de quen parecen cegos diante da  ameaza de Reganosa, que representa un perigo para a vida, profundiza na destrución da nosa Ría, está mergullada desde o seu nacemento na corrupción, e pola contra, tentan atemorizar precisamente a aqueles que, como neste caso,  defenden a vida, a legalidade e a Ría.

Ferrol a 11 de Xuño de 2010

Comité Cidadán de Emerxencia

para a Ría de Ferrol

Hoxe martes dia 1 de Xuño as 11.30h os membros do Comité Cidadán de Emerxencia para a Ría de Ferrol acudiron aos xulgados de Ferrol para presentar un escrito de autoinculpación dirixido á Fiscalia, diante do proceso aberto contra 60 mariscadores da Confraria de Ferrol polo feitos acaecidos en Maio de 2007, cando foi impedida a entrada na nosa Ría do buque gaseiro Galicia Spirit cargado con GNL para subministro da planta de Reganosa. Unha acción decidida polo CCE e na que participaron representantes dos diferentes colectivos que forman parte do CCE e da Asemblea Cidadá .

Os asinantes do documento estiveron acompañados por unha representación dos mariscadores da Confraría de Ferrol imputados polos feitos.

Lembróuse que a ubicación da Planta de Gas de Reganosa no interior da Ría a pesares das sentencias de ilegalidade dictaminadas polo TSXG, constituen a raíz do problema. De ahí o compromiso do CCE durante 10 anos de loita contra a sua ubicación na defensa da legalidade, da vida, da Ría e do Patrimonio.

Álbum fotográfico

RELACION DE INCULPADOS

Solidaridade do CCE cos mariñeiros de Cangas

O Comité Cidadán de Emerxencia para a Ría de Ferrol solidarízase cos mariñeiros xulgados este mércores en Pontevedra,  polas protestas e paralización das obras do porto deportivo de Massó en Cangas, e reitera o seu apoio á loita que están levando a cabo, o Foro Social, a Confraría de Pescadores e o pobo de Cangas, en defensa da legalidade, da súa contorna e do medio de vida de moitas familias

¡Tod@s con Cangas ¡ ¡ A Ría non se vende !

Foro Social de Cangas

Manifesto pola protección da Ría de Vigo

“Nas últimas décadas a ría de Vigo sufriu o impacto da actividade humana. O porto de Vigo destruíu xa máis de dez quilómetros de liña de costa na ribeira sur da ría. O excesivo afán por aumentar a superficie portuaria segue sen respectar os valores ambientais e a forma de vida tradicional e sustentábel das súas xentes.

O proxecto do porto deportivo en Massó (Cangas do Morrazo) derivaría na desaparición do banco pesqueiro e marisqueiro da zona, destruiría importantes hábitat mariños, que son refuxio de flora e fauna, contaminaría a auga, etc.

Xuizo aos mariñeiros de Cangas

Peche de confrarías e lonxas en solidariedade cos mariñeiros de Cangas

Catro autobuses trasladáronse dende O Morrazo até Pontevedra para apoiar os mariñeiros xulgados polas protestas de Salgueirón.

Dez meses de prisión para cada un dos mariñeiros. Esa é a pena que pediu a fiscal para os dous detidos xulgados este mércores en Pontevedra polas protestas e paralización das obras do porto deportivo de Massó en Cangas.

 Ler a noticia completa en Vieiros.com

60 mariscadores da ría de Ferrol procesados

A edición de Ferrol do xornal “La Voz de Galicia“, publica onte -14.04.2010-, unha noticia asinada por Francisco Varela, onde afirma que a titular do Xulgado de Primeira Instancia nº 3 de Ferrol, a Maxistrada-Xuíz Mónica Ramírez Encinas, “procesou por desordes públicas a 60 mariscadores da ría de Ferrol polo corte do paso de buques gaseiros que se dirixían á planta de Reganosa en Mugardos no 2007“. Segundo recolle a noticia citada, a xuíz “considera que os procesados poden ser imputados de delitos de desordes públicas, desobediencia grave á autoridade e coaccións graves“.

Di-se na noticia de referencia que “… O fiscal aínda non se pronunciou en canto aos cargos, pero de prosperar a causa, como se supón que ocorrerá, …”

Mais o que pretenden encausar é unha a acción emprendida polo Comité Cidadán de Emerxencia para a Ría de Ferrol coa colaboración especial dun dos seus compoñentes, a Cofradía de Pescadores e Mariscadores de Ferrol, que impediu, ás 8 da mañá do Luns 7 de Maio de 2007 un acto ilegal e perigoso, que ao día de hoxe aínda segue poñendo en perigo as nosas vidas, a Ría e a nosa seguridade. Trata-se da entrada na Ría de Ferrol de buques gaseiros cargados con GNL-LNG, para a perigosa e ilegal Reganosa. E xa son 64 os buques que entraron na Ría de Ferrol, para atracar no peirao de Punta Promontorio no Concello de Mugardos, en pleno corazón da Ría, moi próxima aos núcleos de poboación e mesmo á beira dun complexo petroquímico [Forestal del Atlántico, SA e Imegasa] onde se almacenan miles de litros de fluídos tóxicos e altamente perigosos [Potencial Efecto Dominó]. A xente do mar, puxo á disposición do Comité Cidadán as súas embarcacións, onde subiron máis persoas polo que non eran só mariscadores, para saír-lle ao encontro do buque gaseiro que ía entrar na Ría, para descargar nunha Planta de Gas que nen tan sequera contaba cos permisos de funcionamento, senón que ademais eran outras persoas ligadas ao Comité, membros de asociacións veciñais, ecoloxistas, políticos, sindicalistas, … e mesmo xornalistas. O buque era o “Galicia Spirit” que tardou tres días en poder entrar, dado que abortou por dúas veces a entrada na Ría.

Desde o Comité Cidadán de Emerxencia, fixera-se un chamamento á cidadanía de Ferrol e Comarca, para que se mobilizara contra o despropósito gasístico de Reganosa e a ilegal entrada de buques gaseiros cargados na nosa Ría. E iso foi o que fixemos en lanchas na Ría e manifestando-nos a pé, no Peirao Curuxeiras de Ferrol.

Compre pois, non só os recursos correspondentes de reforma ou apelación ao auto xudicial de procesamento, senón que é necesaria unha resposta cidadán a semellante atropelo a un dereito inalienábel como é o dereito a loitar contra a inxustiza.

O que pasou en 7 de Maio de 2007, e días posteriores non foi cometer un delito, foi unha protesta cidadá lexítima contra decisións empresariais e administrativas ilegais, inxustas e perigosas.

No 2007, cando detiveran a Bernardo Bastida, daquela Patrón Maior da Cofradía de Pescadores de Ferrol, o Comité Cidadán promovera unha campaña de autoinculpacións, presentando-se no xulgado máis de 1000. Pensamos que cumpre, no caso de prosperar a causa, facer unha nova campaña de Autoinculpacións para este novo procedemento xudicial.

Artigo redactado polos compañeiros do Colectivo Ártabra21